"Pley-off oyunlarında komandaların şansları adətən bərabər olur. Bilirdik ki, “Neftçi” güclü komandadır və bizi çətin oyun gözləyir. Bu mövsüm onlarla 4 dəfə qarşılaşmışıq".

Prosport.Az xəbər verir ki, bu sözləri NTD-nin baş məşqçisi Tahir Baxşıyev Azərbaycan Basketbol Liqasının pley-off mərhələsində "Neftçi"yə 97:94 hesabı ilə qalib gəldikləri oyundan sonra deyib.

Mütəxəssis əzmkar qələbəni şərh edib: "Məşqlərdə yaxşı işlədik. Uşaqlara təşəkkür edirəm. Azarkeşlərə dəstəyə görə minnətdaram. Klub prezidentinə də təşəkkür edirəm. Amma bu, yalnız ilk oyun idi. Arxayınlaşmaq olmaz. Qarşıda cavab oyunu var. Hələ heç nə həll olunmayıb. Hazırlaşacağıq".

O, "Mövsümün ən yaxşı oyununu keçirdiyinizi demək olarmı" sualına isə belə cavab verib: "Qələbəyə baxmayaraq, çox səhvlərə yol verdik. Düşünürəm ki, komandanın potensialı daha yüksəkdir. Problemimiz o idi ki, çox gec yığışdıq. Mövsüm ərzində də heyətdə dəyişikliklər oldu".