"Gəncə" Azərbaycan Basketbol Liqasının pley-in mərhələsinin 2-ci oyununda "Lənkəran"a 101:77 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi öz fikirlərini bölüşüb:

Halil Atlı ("Gəncə"): "Rəqibimizi mübarizəyə görə təbrik edirəm. Xüsusən də baş məşqçi Georgi Kondruseviçi. Bilirəm ki, 2 mövsümdür ki, ağır şərtlər altında iş görməyə çalışır. Sıxıntılı dövrlərdən keçdilər. Buna baxmayaraq, komanda bura qədər gəlib çıxdı. Onlar üçüm mövsüm tamamlandı. Biz yolumuza davam edirik. Oyunda bütün rotasiyamızdan istifadə etməyə çalışdıq. Hamı qələbədə pay sahibi oldu, xoşbəxtəm. Növbəti rəqibimiz "Ordu"dur. Oyun-oyun düşünüb, addım-addım hədəfimizə doğru irəliləyəcəyik. Mövsümü ən yaxşı yerdə bitirmək istəyirik".

Georgi Kondruseviç ("Lənkəran"): "Mövsümü 2 hissəyə bölmək olar: Yeni ildən əvvəl və sonra. Bu, 2 fərqli komandadır və səbəbləri də heyətdə olan itkilər idi. “Lənkəran” azarkeşlərinə ən çətin vaxtlarda belə, bizə verdikləri dəstəyə görə təşəkkür etmək istəyirəm. Onlara böyük "sağ ol" düşür! Həqiqətən də əla idilər. Bu gün hamı çalışdı, amma rəqib demək olar ki, hər şeydə bizdən üstün idi. “Gəncə”yə növbəti mərhələdə uğurlar arzulayıram. Oyunçularımızı da xüsusi qeyd etmək istəyirəm. Çünki yaranmış şəraitdə həm fiziki, həm də psixoloji baxımdan mübarizə aparmaq asan deyil. Onlar sona qədər çalışdılar və mübarizə apardılar, buna görə təşəkkür edirəm”.