"Əvvəlki seçmə mərhələlərlə müqayisədə budəfəki püşktamada rəqiblərimiz yaxşı oldu".

Bunu Prosport.Az-a açıqlamasında qadın basketbolçulardan ibarət Azərbaycan millisinin baş məşqçisi Evrən Alkaya deyib.

O bildirib ki, əsas məqsəd gənc basketbolçuların inkişafına nail olmaqdır: “Biz turnirlərdə əsasən gənc oyunçularla iştirak edirik. Bu yarışlar yayda keçiriləcək B divizionu matçlarına hazırlıq xarakteri daşıyır. Başlıca məqsədimiz mövcud imkanlardan istifadə edərək bu gənclərin gələcəkdə Azərbaycan qadın basketbolunun əsas üzvlərinə çevrilməsini təmin etməkdir”.

Türkiyəli mütəxəssis komanda ilə bağlı planlarını da bölüşüb: "AVRO-2029-un ilkin seçmə mərhələsində ilk oyunlarımız noyabrın 11-17-si tarixlərində keçiriləcək. Bu çərçivədə İrlandiya və İslandiya ilə qarşılaşacağıq. Heyətə 2-3 təcrübəli basketbolçu cəlb edə bilsək, daha güclü çıxış edəcəyimizə inanırıq. Qarşıda uzunmüddətli proses var. Yeni oyunçuların da özlərini sübut edəcəklərinə ümid edirik. Basketbolumuzun inkişafı üçün əlimizdən gələni edəcəyik”.

Xatırladaq ki, Azərbaycan millisi AVRO-2029-un ilkin seçmə mərhələsində A qrupunda İsveçrə, İslandiya və İrlandiya ilə mübarizə aparacaq.