"Sumqayıt"ın oyunçu-məşqçisi Aleksey Kitayev Azərbaycan Basketbol Liqasının pley-in mərhələsinin NTD ilə oyunundan öncə klubun mətbuat xidmətinə açıqlama verib.

Prosport.Az xəbər verir ki, o, son olaraq “Sərhədçi” ilə oyunda qeydə alınan məğlubiyyətə xüsusi toxunub: 

Bu mövsüm çox maraqlı keçdi. Bəli, qrupda 3-cü yeri tuta bilərdik, amma son oyunda emosiyalar pik həddə çatdı. Baş məşqçimiz Vadim Kuramşın matçın sonlarında texniki zonadan kənarlaşdırıldı. Eyni zamanda əsas oyun qurucumuz Keon Klerqot da 5 foul alaraq kənarda qaldı. Nəticədə biz oyunun son hissəsini “Sərhədçi”yə uduzduq. Yeri gəlmişkən, “Sərhədçi” klubunu və onların baş məşqçisi Anar Sarıyevi qrupumuzda 3-cü yer tutması münasibətilə təbrik edirəm. Biz onunla uzun illər eyni klubda oynamışıq. Onlara pley-in mərhələsində uğurlar arzulayıram. Xüsusilə öz legionerlərimizə təşəkkür etmək istəyirəm. Mövsümboyu layiqincə, matç boyunca fasilə vermədən 40 dəqiqə mübarizə apardılar və əla  statistik göstəricilərlə yadda qaldılar. O ki qaldı NTD klubu ilə pley-in seriyamıza, mərhələ adlamaq üçün əlimizdən gələnin ən yaxşısını edəcəyik. Komandamıza uğurlar arzulayıram”