Xorvatiyanın paytaxtı Zaqrebdə keçirilən Avropa çempionatında sərbəst güləş üzrə mübarizəyə yekun vurulub. Millimiz qitə birinciliyində 2 qızıl, 2 gümüş və 2 bürünc olmaqla, 6 medal qazanıb. Bu nəticələrlə komandamız 150 xal toplayaraq Avropa çempionu olub. Bu, sərbəst güləş üzrə yığmamızın ardıcıl 2-ci, ümumilikdə isə 4-cü Avropa çempionluğu olub.
Prosport.Az əvvəlki 3 Avropa çempionluğu ilə indiki arasında müqayisə aparıb.
Əvvəla, onu qeyd edək ki, nə ötən il, nə də builki yarışda əsasən Dağıstan, Çeçenistan və Şimali Osetiya güləşçilərindən qurulmuş güclü Rusiya və Belarusdan olan idmançılar millimizin üzvləri ilə qarşılaşmayıb. Ötən il Macarıstanın paytaxtı Budapeştdə keçirilmiş yarışda hər 2 ölkənin idmançıları Ukraynadakı müharibə səbəbindən turnirə buraxılmayıb. Bu dəfə isə 2 belə güləşçi Ümumdünya Güləş Birliyi bayrağı altında (neytral status) yarışa buraxılsa da, onlar idmançılarımızın rəqibləri deyildilər.
Vilnüs, Litva – 2009 (7 çəkinin 6-da medal qazanılıb və Rusiyanı qabaqlayıb 63 xalla çempion olmuşuq)
Zəlimxan Hüseynov (60 kq), Çamsulvara Çamsulvarayev (74 kq), Xetaq Qozyumov (96 kq), Əli İsayev (120 kq) – hamısı qızıl medal
Cəbrayıl Həsənov (66 kq) – gümüş medal
Novruz Temrezov (84 kq) – bürünc medal
Novi Sad, Serbiya – 2017 (8 çəkinin 5-də medal qazanılıb və Türkiyə ilə Rusiyanı qabaqlayıb 58 xalla çempion olmuşuq)
Giorgi Edişeraşvili (57 kq) – qızıl medal
Murad Süleymanov (74 kq), Aleksandr Qostiyev (86 kq), Camaləddin Məhəmmədov (125 kq) – hər üçü gümüş medal
Ruslan Dibirhacıyev (70 kq) – bürünc medal
Budapeşt, Macarıstan – 2022 (10 çəkinin 7-də medal qazanılıb və Türkiyəni qabaqlayıb 159 xalla çempion olmuşuq)
Məhəmmədxan Məhəmmədov (97 kq) – qızıl medal
Əliabbas Rzazadə (57 kq), Hacı Əliyev (65 kq), Əşrəf Aşırov (79 kq), Əbubəkr Abakarov (86 kq) – hamısı gümüş medal
Turan Bayramov (74 kq), Osman Nurməhəmmədov (92 kq)
Zaqreb, Xorvatiya – 2023 (10 çəkinin 6-da medal qazanılıb və Gürcüstanı qabaqlayıb 150 xalla çempion olmuşuq)
Əliabbas Rzazadə (57 kq), Hacı Əliyev (70 kq) – hər ikisi qızıl medal
Osman Nurməhəmmədov (92 kq), Məhəmmədxan Məhəmmədov (97 kq) – hər ikisi gümüş medal
Əbubəkr Abakarov (86 kq), Georgi Meşvildişvili (125 kq) – hər ikisi bürünc medal
Sərbəst güləş millimizdə legionerləşdirmə siyasəti hər zaman tənqid edilib. Digər Avropa çempionluqlarının qazanılmasında Rusiya və Gürcüstandan gətirilmiş legionerlərin daha çox rolunun olduğunu görmək mümkündür. 4 Avropa çempionluğu içərisində öz güləş məktəbimizin yetirmələrindən qızıl medalları qazananlar yalnız ən sonuncusunda – “Arena Zaqreb”də baş tutmuş yarışda olub. Deməli, bu Avropa çempionluğu daha doğma, daha şirin, daha gözəl görünür. Ümid edək ki, üçqat Olimpiya mükafatçısı, dünya və üçqat Avropa çempionu Xetaq Qozyumovun rəhbərliyi altında legionerləşdirmə siyasətinə son qoyulub, yeni hacılar, yeni əliabbasların yetişdirilməsi yönündə uğurlu iş görüləcək.
Səbuhi Musa