"Neftçi" Azərbaycan Basketbol Liqasının XX turunda NTD-yə 93:83 hesabı ilə qalib gəlib.

Prosport.Az xəbər verir ki, matçdan sonra hər 2 komandanın baş məşqçisi fikirlərini bölüşüb.

Tahir Baxşıyev (NTD): "Oyun bərabər mübarizə şəraitində keçdi. Qələbə qazana bilərdik. Bu oyun daha çox “Neftçi” üçün vacib idi. Onlar pley-offa birbaşa vəsiqə qazandılar. Hamı bilir ki, “Neftçi” güclü komandadır. İndi biz pley-in mərhələsinin oyunlarına hazırlaşacağıq. Rəqibimiz “Sumqayıt” olacaq. Çox yaxşı komandadır və bunu dəfələrlə sübut ediblər. Onlara qarşı oynamaq həmişə çətin olur. Hazırlıq üçün çox vaxtımız olmayacaq, amma oyuna hazırlaşacağıq".

Daviti Çivçivadze ("Neftçi"): "Əvvəlcə “Neftçi” ailəsinin bütün üzvlərini təbrik edirəm! Bu, yəqin ki, mövsüm ərzində indiyə qədər keçirdiyimiz ən çətin oyun idi. Görüşə zədələr səbəbindən bəzi oyunçularımızın yoxluğu ilə başladıq və matç ərzində qayda pozuntuları ilə bağlı problemlərlə üzləşdik. Təəssüf ki, Stefan Keniç də zədə aldı və hələ də zədənin nə dərəcədə ciddi olduğunu bilmirik. Bütün bunlara baxmayaraq, komanda yüksək xarakter nümayiş etdirdi və son fitə qədər mübarizə apardı. Bu axşam oyunçuların göstərdiyi əzm və peşəkar yanaşma ilə fəxr edirəm. İndi diqqətimizi pley-off mərhələsinə yönəldəcəyik. Bərpa olunmalı, daha yaxşı hazırlaşmalı və daha yüksək səviyyədə çıxış etməliyik.
Sonda isə bütün oyunboyu göstərdikləri davamlı dəstəyə görə azarkeşlərimizə təşəkkürümü bildirirəm”.