Milli Olimpiya Komitəsinin təşəbbüsü və Azərbaycan Güləş Federasiyasının dəstəyi ilə tədbir keçirilib.

Prosport.Az xəbər verir ki, tədbirdə veteran güləşçilər, ikiqat olimpiya mükafatçısı, üçqat dünya və dördqat Avropa çempionu Hacı Əliyev, olimpiya mükafatçısı, dünya və Avropa çempionu Rəsul Çunayev, eləcə də yunan-Roma üzrə olimpiya və dünya mükafatçısı, üçqat Avropa çempionu Həsrət Cəfərov, Avropa mükafatçısı və U-23 dünya çempionu Jalə Əliyeva gənclərlə görüşüblər.

Onlar öz həyat hekayələrindən, əldə etdikləri uğurlardan və idman karyeralarında yaşadıqları çətinliklərdən danışıblar. Öölkədə idmana verilən böyük dəstəyi xüsusi vurğulayaraq, gənclərə idmanla məşğul olmağın önəmindən bəhs ediblər.

Tədbirdə güləş idman növü ilə bağlı maraqlı müzakirələr aparılıb, iştirakçılarla təcrübə mübadiləsi həyata keçirilib. Eyni zamanda, proqram çərçivəsində sual-cavab sessiyası və imza mərasimi təşkil olunub, müsabiqə keçirilib, qaliblərə və iştirakçılara hədiyyələr təqdim edilib.