"Yarışa ciddi hazırlıq görmüşdük".

Bu sözləri Prosport.Az-a açıqlamasında Serbiyanın Zrenyanin şəhərində keçirilən U-23 Avropa çempionatında qızıl medal qazanan Azərbaycan güləşçisi Elmin Əliyev deyib.

82 kiloqram çəki dərəcəsində çıxış edən idmançı nəticəyə görə qürur hissi keçirdiyini söyləyib: "Azərbaycan himnini beynəlxalq arenada səsləndirmək çox böyük uğurdur. Turnirə həqiqətən də ciddi hazırlaşırdım. Bunun da bəhrəsini yekunda gördüm. Düzünü desəm, qarşılaşdığım bütün rəqiblər kifayət qədər güclü idilər".

Gənc idmançı gələcək hədəfləri barədə də danışıb: "Bizi qarşıda gənclərin Avropa çempionatı gözləyir. Həmçinin də U-20 və U-23 dünya çempionatları var. Hər birində iştirak etmək istəyirəm. Amma bu qərarı məşqçiləri heyəti verir. Mübarizə apardığım bütün turnirlərdə medal qazanmaq niyyətindəyəm".

Xatırladaq ki, Azərbaycanın yunan-Roma güləşçiləri U-23 Avropa çempionatında 5 medal əldə ediblər.