"Quba" Azərbaycan Basketbol Liqasının XIX turunda səfərdə "Lənkəran"a 94:88 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Şəhriyar Əsgərov ("Quba"): "Çətin oyun oldu. Qalib gəldiyimiz üçün şadam. Matçda diqtə edən tərəf biz idik. "Lənkəran" güclü müqavimət göstərdi. Lakin sona qədər üstün olduq. Rəqib də yaxşı oynadı. Komandamızda zədəlilər var idi. Zaur Paşayev meydançada az vaxt keçirdi, Andrey Kondratyev də zədəli idi. Gənc oyunçularımıza şans verdik. Qalibiyyət bizi sevindirdi. Müntəzəm mövsümün son matçı "Naxçıvan"a qarşıdır. Ciddi və güclü rəqiblə oynayacağıq. Əlimizdən gələni edəcəyik. Onlara da qalib gəlmək istəyirik ki, 3-cü yerdə qərarlaşaq. Necə alınacağını zaman göstərəcək. Pley-off məsələləri haqda danışmaq tezdir. Yəqin ki, başqa komadaların da bu barədə öz planları var. Hələ son matça hazırlaşacağıq".

Georgi Kondruseviç ("Lənkəran"): “Basketbolçularım qələbə qazanmaq üçün çox çalışdılar. Onlara böyük təşəkkür edirəm. Həmçinin bizim azarkeşlərimizə də böyük minnətdarlığımı bildirirəm. Yaranmış vəziyyətə baxmayaraq, yenə də zala gəlib bizi dəstəklədilər! Onlara təşəkkür edirəm.

Məğlubiyyətin səbəbi isə tam başqa məsələlərdə gizlənir. Biz bu gün cəmi 7 nəfərlə oynadıq. Həmçinin Qatluak Ceyms də bu gün zədə aldı və bunun nə dərəcədə ciddi olduğunu hələ bilmirik. Həkim bunun üzərində işləyir.

"Quba"nı qələbə münasibətilə təbrik edirəm. Onlar bizdən daha təcrübəli və intizamlıdırlar. Oyunumuzu düzəltmək üçün nə vaxtımız, nə də oyunçu resursumuz var. Buna görə də belə enişlər olur və sonra həmin vəziyyətdən çıxmaq çətinləşir. Ümid edirəm ki, növbəti oyuna tam heyətlə, yəni 8 nəfərlə çıxacağıq”.