"Sumqayıt" Azərbaycan Basketbol Liqasının XIX turunda "Ordu"ya 98:121 hesabı ilə uduzub.

Prosport.Az xəbər verir ki, "gənclik şəhəri" təmsilçisinin baş məşqçisi Vadim Kuramşın matçla bağlı fikirlərini bölüşüb:

"Ordu"nu qələbə münasibətilə təbrik edirəm. Oyunun əvvəlində komandamızın aparıcı oyunçusu Keon Klerqot zədələndi və meydanı tərk etmək məcburiyyətində qaldı. Daha doğrusu, onun əvvəldən zədəsi var idi, bu gün eyni yerdən problemlə üzləşdi. Bir sözlə, bəxtimiz gətirmədi. Oyun qurucumuz olmadan mübarizə aparmaq çətin idi. Üstəlik, Cey-Cey Kolakon da fol limitiini dolduraraq meydandan kənarlaşdırıldı. Müəyyən müddət rəqibə müqavimət göstərdik, amma yenə də gücümüz çatmadı. Eybi yoxdur, şanslarımızı qoruyuruq. Bir müsbət məqamı da qeyd edim ki, bu gün yerli basketbolçularımız 30 xal yığdı. Mən onların hər oyun belə məhsuldar oynamasını istəyirəm".