Azərbaycanlı döyüşçü Tofiq Musayev  "Bellator" və "Rizin"in birlikdə təşkil etdiyi "Super Rizin 2" turnirində döyüşə çıxıb.

Prosport.Az xəbər verir ki, o, Yaponiyada keçirilən turnirdə yerli idmançı Akira Okada ilə qarşılaşıb. Musayev döyüşün 2-ci raundunda rəqibini nokauta salıb. 

Xatırladaq ki, Tofiq Musayev Rizin Qran Prisininin sabiq çempionudur. Bu qələbə onun 21-ci zəfəri olub.

Yeri gəlmişkən, bu görüşü izləyənlər arasında Milli Məclisin vitse-spikeri, Azərbaycan Kikboksinq Federasiyasının (AKF) fəxri prezidenti Adil Əliyev və AKF prezidenti Orxan Əliyev də olub. A.Əliyev özünün Feysbuk səhifəsində döyüşlə bağlı bunları yazıb: 

“Tokioda keçirilən döyüşdə həmyerlimiz Tofiq Musayev rəqibi üzərində inamlı qələbə qazanaraq, bizi sevindirdi. Tofiq peşəkar idmançı olmaqla bərabər, Vətən müharibəsində könüllü olaraq hərbi əməliyyatlara qatılıb və bizə tarixi qələbəmizi bəxş edən rəşadətli Azərbaycan Ordusunun tərkibində döyüşüb”.