“Güləşə 2009-cu ildə Gəncə şəhərində başlamışam. İdmana həvəsim həddən çox idi. Ancaq anam icazə vermirdi. Ad günümdə mənə hədiyyə olaraq idmana yazdırmasını xahiş etdim. O da razılaşdı".
Prosport.Az xəbər verir ki, bu sözləri qadınlardan ibarət millinin lideri, U-23 dünya və Avropa çempionu, İslam Həmrəyliyi Oyunlarının ikiqat qalibi, dəfələrlə böyüklər arasında qitə mükafatçısı olan Jalə Əliyeva deyib.
8 Mart – Beynəlxalq Qadınlar Günü münasibətilə Azərbaycan Güləş Federasiyası onun haqqında videomaterial hazırlayıb. 25 yaşlı güləşçi karyerası boyunca keçdiyi yoldan, üzləşdiyi çətinliklərdən, qazandığı uğurlardan və gələcək hədəflərindən danışıb:
"Güləşə başlayanda çox həyəcanlı idim. Zala gəldim, güləşənlərin hamısı oğlan idi. Düşünürdüm ki, burada necə məşq edəcəyəm. Ancaq idmana o qədər həvəsim var idi ki, bu məqam mənim üçün o qədər də önəmli deyildi. Düşünürdüm ki, bir gün mən də çempion olacağam və məni də TV-də göstərəcəklər.
2016-cı ildə yeniyetmələrin (U-17) Avropa çempionatında gümüş medal qazandıqdan sonra bir neçə il nüfuzlu yarışlarda uğur əldə edə bilmədim. Düşünürdüm ki, məndə artıq alınmır, idmanla vidalaşmaq lazımdır. Məşqçimiz Həsrət Məmmədyarov dedi ki, sənin hələ nə yaşın var.
2022-ci ildə U-23 Avropa çempionu oldum. Bu yarış mənə çox motivasiya verdi. Qarşıma məqsəd qoymuşdum ki, dünya çempionu olmalıyam. 2024-cü ildə U-23 dünya çempionu olarkən çəkdiyim əziyyətlər, aldığım zədələr yadıma düşmürdü. Həmin an özümü göylərdə hiss edirdim. Bayrağın dalğalanması, himnin səslənməsi… özümü çox xoşbəxt hiss edirdim.
Həmin il Bakıda keçirilən U-23 Avropa çempionatının da qalibi oldum. Bu yarışa çox yaxşı hazırlaşmışdıq. Ən böyük motivasiyam anam oldu. O da Gəncədən Bakıya yarışı izləməyə gəlmişdi. Çox xoşbəxtəm ki, anamın arzusunu reallaşdırdım.
Amma bu nəticələrlə kifayətlənmirəm. Böyüklər arasında da Avropa və dünya çempionu, həmçinin olimpiya çempionu olmaq istəyirəm. Gələcək nəslə örnək olmaq istəyirəm. Əlimdən gələni edəcəyəm ki, Azərbaycanı beynəlxalq arenalarda layiqincə təmsil edim.
Hər qadın öz ayaqları üstündə durmalıdır. Öz gələcəyini qurmalıdır.
Xalça üzərinə çıxan zaman yalnız özüm üçün yox, xalqım və Vətənim üçün mübarizə aparıram. Böyük uğurlar qazanaraq Azərbaycan qadın güləşində iz qoymaq və inkişafında rol oynamaq istəyirəm”.