Son dövrlər "Qarabağ"ın 15 yaşlı futbolçusu Əli Bəşirov öz oyunu ilə diqqət çəkir. 

Prosport.Az xəbər verir ki, o, yaşının az olmasına baxmayaraq, bu qış hətta Qurban Qurbanov tərəfindən əsas komandanın Türkiyənin Antalya şəhərindəki toplanışına cəlb olunub. Yəni, hücumameyilli yarımmüdafiəçi öz potensialı ilə təcrübəli mütəxəssisin də diqqətini çəkib.

Bəşirov həm də Azərbaycanın U-18 milli komandasının üzvüdür və bu yaxınlarda Belarusda keçirilən Beynəlxalq İnkişaf Turnirində iştirak edib, gözəl qol vurması ilə fərqlənib.

Futbolçunun oyunu artıq bəzi xarici klubların da diqqətini cəlb edib. Etibarlı mənbələrdən qol.az-a daxil olan xəbərə görə, istedadlı futbolçu Fransanın "Strasburq" klubunun maraq dairəsinə düşüb. Bəşirov artıq Liqa-1 təmsilçisinin düşərgəsinə baxışa dəvət edilib. İddiaya görə, yarımmüdafiəçi bu ilin may ayında Fransaya yola düşəcək və "Strasburq"un düşərəsində 10-15 günlük baxışda olacaq. Onun gənclərdən ibarət komandada hazırlıq keçəcəyi bildirilir. Bəşirov baxış zamanı da özünü doğrultsa, yeni mövsümdən karyerasını Fransada davam etdirəcək.