"Qarabağ"ın futbolçusu Elvin Cəfərquliyev "Nyukasl Yunayted"ə bu mövsüm 2 qol vuran nadir oyunçulardandır.

Prosport.Az-ın xəbərinə görə, bu göstəriciyə Niko ORili, misirli Ömər Marmuş (hər ikisi "Mançester Siti"), amerikalı Brenden Aaronson ("Lids"), argentinalı Kristian Romero ("Totenhem") və Dani Velbek ("Brayton") nail olub.

"Barselona"nın ingiltərəli hücumçusu Markuş Rəşford isə Elvin kimi UEFA Çempionlar Liqasında "Nyukasl"a 2 qol vurub. Lakin bu futbolçuların hamısı 1 matçda "Nyukasl"ın qapısına dubl edib. 

Cəfərquliyev kimi hər 2 matçda "sağsağanlar"ın qapısına yol tapmış futbolçular isə braziliyalı Tiaqo ("Brentford"), fransalı Üqo Ekitike ("Liverpul") və  serbiyalı Saşa Lukiçdir ("Fulhem"). Tiaqo 4, Ekitike 3 və Lukiç 2 dəfə bu qola sevinib.

Qeyd edək ki, cinah müdafiəçisi olan Elvin Cəfərquliyev Bakıdakı matçda 54-cü və İngiltərədəki oyunda 57-ci dəqiqədə "Nyukasl"a qol vurub.