Azərbaycanın sərbəst güləşçiləri Albaniyanın paytaxtı Tiranada bu gün start götürən “Muhamet Malo” turnirinə 3 medalla başlayıb.
Prosport.Az xəbər verir ki, reytinq turnirinin ilk günündə sərbəst güləş üzrə millinin 5 üzvü mübarizə aparıb.
İslam Bazarqanov (57 kq) almaniyalı Niklas Steşele (3:2), amerikalı Liam Smit Kroni (5:0) və Puerto Riko təmsilçisi Daryan Kruza (6:1) qalib gələrək yarımfinala yüksəlib. Milli üzvü yarımfinalda rusiyalı Ramiz Qamzatova 1:3 hesabıyla məğlub olsa da, hindistanlı Akşay Tanaci Dheredən güclü (9:2) olaraq bürünc medalı boynundan asıb.
Rəşid Babazadə (65 kq) almaniyalı Niko Meqerle (12:2), bolqarıstanlı Mikyay Salim Nayim (8:7) və ekvadorlu Coşua Aleksandr Kramerə (10:0) qalib gələrək adını yarımfinala yazdırıb. Finalın bir addımlığında Azərbaycan əsilli amerikalı dünya çempionu Vitali Orucovla qarşılaşma gərgin mübarizə şəraitində keçib. Əzmkarlıq nümayiş etdirən Rəşid son saniyədə 4 xallıq fəndi icra edərək yekunda 18:15 hesablı qələbəylə finala vəsiqə qazanıb. Babazadə finalda hindistanlı Sucet Sucetlə qarşılaşıb. U-23 dünya çempionatının son qalibiylə bacarmayan (0:10) Babazadə turniri gümüş medalla başa vurub.
Kənan Heybətov (74 kq) 1/8 finalda qırğız Orozbek Toktomambetova (1:3), onunla eyni çəkidə çıxış edən Turan Bayramov isə eyni mərhələdə amerikalı Kuinsi Mayls Mondeyə (1:5) məğlub olub.
Arseni Cioyev (86 kq) rusiyalı dünya və ikiqat Avropa çempionu Axmed Usmanovu 3:1, gürcüstanlı dünya və Avropa mükafatçısı Vladimeri Qamkrelidzeni isə 6:4 hesabıyla üstələyib. Təmsilçimiz finalın bir addımlığında rusiyalı İbragim Kadiyevə 2:3 hesabıyla məğlub olub. Cioyev amerikalı ikiqat olimpiya mükafatçısı və dördqat dünya çempionu Kayl Deykə (4:1) qalib gələrək bürünc medala sahib çıxıb.
21:25
Azərbaycanın sərbəst güləşçiləri Albaniyanın paytaxtı Tiranada keçirilən "Muhamet Malo" turnirində mübarizəyə start veriblər.
Prosport.Az xəbər verir ki, reytinq turnirində təmsilçilərimizdən biri finala, digər ikisi isə 3-cü yer uğrunda görüşə vəsiqə qazanıb.
65 kq çəkidə yarışan Rəşid Babazadə yarımfinala qədər uğurla çıxış edib və finala gedən yolda Azərbaycan əsilli amerikalı dünya çempionu Vitali Orucova qalib gələrək qızıl medal uğrunda görüşdə iştirak hüququ qazanıb.
İslam Bazarqanov (57 kq) və Arseni Cioyev (86) isə 3-cü yer uğrunda qarşılaşmalarda qüvvələrini sınayacaq.