Basketbol üzrə Azərbaycan Kubokunun qalibi bəlli olub.

Prosport.Az xəbər verir ki, final oyununda "Sabah" və "Gəncə" komandaları üz-üzə gəlib.

Bakı İdman Sarayında keçirilən qarşılaşma "Gəncə"nin sensasional qələbəsi ilə başa çatıb. Gəncə təmsilçisi 89:82 hesablı qələbə qazanıb. Bu, "Gəncə"nin 3 Azərbaycan Kubokunun final görüşündən 2-ci qələbəsi olub.

Oyunun MVP-si isə "Gəncə"nin amerikalı oyunçusu Carvis Qarett olub. O, finalda 19 xal, 7 ribaund  və 5 assist göstəricisinə imza atıb. Basketbolçuya MVP mükafatını federasiyanın Rəyasət Heyətinin üzvü, Azərbaycan Texniki Universitetinin rektoru Vilayət Vəliyev, komandaya Kuboku isə federasiya prezidenti, elm və təhsil naziri Emin Əmrullayev təqdim edib.

Qeyd edək ki, ötən il NTD klubu Azərbaycan Kubokunun qalibi olub. Onlar finalda "Gəncə"yə 81:72 qalib gəlmişdi.