III MDB Oyunlarında bürünc medal qazanan boksçu Əli Ruşanov ölüb.

Prosport.Az xəbər verir ki, o, şəxsi məşqçilərinin istəyi ilə digər yeniyetmə boksçu Vaqif Məhəmmədli ilə sınaq döyüşü (sparrinq) keçirib.

Federasiyadan qafqazinfo-ya bildirilib ki, 6-7 dəqiqə davam edən sparrinq zamanı Əli Ruşanov huşunu itirərək yerə yıxılıb. Dərhal təcili yardım briqadası müdaxilə edib və o, 1 saylı Şəhər Kliniki Xəstəxanasına çatdırılsa da, orada vəfat edib.

Vaqif Məhəmmədli və Əli Ruşanov yaxın günlərdə keçiriləcək yeniyetmələr arasında Azərbaycan çempionatına hazırlaşmaq üçün məşqçiləri ilə birgə Bakıya gəliblər.

Hadisə ilə bağlı hüquq mühafizə orqanları tərəfindən araşdırma aparılır.

16 yaşlı idmançı dəfələrlə ölkə və beynəlxalq yarışlarda uğurlu çıxışları ilə yadda qalıb.