"Sabah" Azərbaycan Basketbol Liqasının XVII turunda NTD-yə 103:87 hesabı ilə qalib gəlib.

Prosport.Az xəbər verir ki, hər iki komandanın baş məşqçisi oyunla bağlı fikirlərini bölüşüblər.

Rimas Kurtinaytis ("Sabah"): "Hassani və Klavsın mikrozədələri olduğu üçün bu gün heyətdə yox idilər. Kubok oyunları öncəsi risk etmək istəmədik. Əvəzində digər oyunçularımız daha çox şans qazandılar. Uzun müddətdən sonra heyətə qayıdan Andriinin oyunundan razı qaldım. Müdafiədə yaxşı iş gördü. Hücumların qurulmasında fəal idi. Mövsüm ərzində zədələr və cəza ola bilər. Ona görə də heyətdəki oyunçular həmişə hazır olmalıdır. Oyuna gəlincə, NTD çox yaxşı mübarizə apardı. Komandada məşqçi işi hiss olunur. Gərgin oyun alındı. Qələbə qazansaq da, rəqib bizə çətinlik yaratmağı bacardı".

Tahir Baxşıyev (NTD): "Oyuna yaxşı başladıq və ilk 2 periodu pis keçirmədik. Ümumilikdə də oyunu yaxşı keçirdik. “Sabah” çox güclü komandadır. Oyundan razıyam. Amma elə məqamlar var idi ki, onlardan narazı qaldım. 11 sərbəst atışı dəqiq yerinə yetirə bilmədik. 18 top itkisinə yol verdik. Bu çatışmazlıqları aradan qaldırsaq, çempionatda istənilən komandaya qarşı mübarizə apara bilərik. Bugünkü oyunda çoxlu müsbət məqamlar gördüm. Hesaba baxmayaraq, meydançada mübarizə var idi və biz böyük istəklə oynayırdıq.
Pley-in mərhələsinin oyunlarına qədər qarşıda daha 3 tur var. Kubok oyunlarına görə liqada indi uzun fasilə yaranacaq. 2 yoxlama oyunu keçirməyi planlaşdırırıq. Hazırlaşacağıq, səhvlər üzərində işləyəcəyik. Sona qədər mübarizə aparmaq niyyətindəyik".