"Gücümüz çatdığı qədər oynamağa çalışdıq. Pis də alınmadı. Təbii ki, qalibiyyət üçün oynayırdıq. Amma rəqibin də gücünü bilirdik".

Prosport.Az xəbər verir ki, bu sözləri "Quba"nın baş məşqçisi Şəhriyar Əsgərov Azərbaycan Basketbol Liqasının XVII turunda "Ordu"ya 87:98 hesabı ilə uduzduqları oyundan sonra deyib.

Mütəxəssis rəqibi qələbə münasibətilə təbrik edib: "Bu cür oynamağa davam etsələr, finala qədər gedib çıxarlar. Gənc məşqçi həmkarımız olan Polad Həsənovu da təbrik edirəm, həqiqətən oyunu yaxşı qurur, yaxşı məşqçidir. Biz də sona qədər mübarizə aparacağıq. Əlimizdən gələni edəcəyik. Ümidvaram ki, hər şey yaxşı olacaq. İşləməyə davam edəcəyik".