"Naxçıvan" Azərbaycan Basketbol Liqasının XVII turunda səfərdə "Sumqayıt"ı 110:107 hesabı ilə məğlub edib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Vadim Kuramşın ("Sumqayıt"): "Uşaqları təbrik edirəm. Son saniyəyə qədər döyüşdülər. Oyunun gedişində 21 xal fərqilə geridə olsaq da, vəziyyəti xeyrimizə dəyişə bilərdik. Sadəcə bəxt bizdən üz döndərdi. Son saniyələrdə 2 xal və üstəlik foul atışı qazanmaq əvəzinə "3-lük" atsaydıq, daha yaxşı olardı. Keon Klerqot sadəcə ani qərar verdi. Belə məqamda doğru qərar qəbul etmək çətindir. Rəqib fol limitiini doldurmuşdu deyə, belə variant seçildi. İstənilən halda yaxşı oynadıq və növbəti matça hazırıq".

Nikola Bozinoski ("Naxçıvan"): "İlk olaraq rəqibimizi təbrik edirəm. Bizə qarşı hər zaman yaxşı mübarizə aparırlar. Müdafiədə yaxşı çıxış etsək də, daha sonra problemlər yaşamağa başladıq. Lavon Holland zədə səbəbindən meydana çıxa bilmədi və 2 oyunqurucu arasında rotasiya aparmağa məcbur oldum. Bu vəziyyət də bizə çətinlik yaratdı. Rəqib son periodda çox yaxşı xal topladı. Ribaundlarda belə, uğurlu performans göstərdilər. Matçın sonlarına yaxın daha yorğun olan tərəf biz idik. Əvəzetmələrdə sıxıntılarımız var idi".