"Sərhədçi" Azərbaycan Basketbol Liqasının XVII turunda səfərdə "Lənkəran"a 83:69 hesabı ilə qalib gəlib.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüblər.

Anar Sarıyev ("Sərhədçi"): "Birincisi, Lənkərana gəlməyimiz çox çətin oldu. 3 saatlıq yolu 6 saata gəldik. Hava şəraitinə görə bu problemlə üzləşdik. Bir az yorğun idik. Buna baxmayaraq uşaqlar yaxşı toparlandılar. Oyunun 2 hissəsini yaxşı çıxış etdik. Sonrasında bir az yorğunluq hiss edilməyə başladı. Müdafiədə səhvlər etdik. Amma buna baxmayaraq qələbə qazandıq. Komandanı təbrik edirəm və oyunçularıma təşəkkür edirəm. Bir az vaxtımız olacaq, çünki kubok matçları baş tutacaq. Bu ərəfədə məşq edib toparlanmağa daha çox vaxtımız olacaq".

Georgi Kondruseviç ("Lənkəran"): "Bu gün cəmi 8 nəfər idik, sabah isə bəlkə də daha az ola bilərik. Zədəli şəkildə oynayan oyunçularımız da var. Bu, onların performansına birbaşa təsir edir. Rotasiya demək olar ki, yoxdur. Oyunlara normal hazırlıq isə ümumiyyətlə yoxdur, çünki bunun üçün ən azı 10 oyunçu lazımdır. Amma biz 3-ə 3 formatında məşq edirik. Buna baxmayaraq, mübarizə aparmağa çalışdıq və buna görə uşaqlara minnətdaram. Allah eləməsin, kimsə bizim düşdüyümüz vəziyyətə düşsün. Oyunçular və azarkeşlərimiz üçün bu vəziyyətə psixoloji cəhətdən dözməyin nə qədər çətin olduğunu təsəvvür edə bilirəm".