Azərbaycanlı kikboksçu Bəhram Rəcəbzadə orta ağır çəkidə kəmər döyüşünə çıxacaq.

Prosport.Az-ın xəbərinə görə, idmançımızın rəqibi Niderland vətəndaşı olan surinamlı Donovan Vise (Donovan Wisse) olacaq.

Bu döyüş aprelin 25-də "Glory 107" turniri çərçivəsində Niderlandın Rotterdam şəhərində baş tutacaq. 28 yaşlı Donovan Vise 2021-ci ildən "Glory" təşkilatının orta çəkidə çempionu titulunu özündə qoruyub saxlayır. O bundan sonra 6 dəfə bu kəməri müdafiə edə bilib. Ümumiyyətlə, bu idmançı keçirdiyi 24 döyüş ərzində yalnız 1 dəfə uduzub. Bu, 2018-ci ilin 8 dekabrında Niderland türkü olan, "Glory"də debüt edən Ərtuğrul Bayrakla döyüş zamanı olub (hakimlərin qərarına əsasən qələbə Bayraka verilib).

Ötən il B.Rəcəbzadəni məğlub edərək orta ağır çəkidə çempionluq titulu qazanan Niderland vətəndaşı olan mərakeşli Tarik Kbabez isə bu tituldan məhrum edilib. Buna səbəb idmançının əvvəlcə Bəhramla döyüşə razılıq verməsi və daha sonra bundan imtina etməsidir. Ötən ilin 11 oktyabrında onlar arasında keçirilən döyüş "İlin döyüşü" adlandırılmış və azarkeşlər bu idmançıların yenidən qarşılaşmasını tələb etmişdilər. Lakin Kbabezin imtinasından sonra təşkilat onu bu kəmərdən məhrum edib və hazırda kəmər öz yeni sahibini gözləyir.

Qeyd edək ki, Bəhram Rəcəbzadə 2 gün əvvəl rumıniyalı Kristian Ristaya qalib gəldikdən sonra mikrofonu əlinə alaraq kəmər üçün revanş döyüşünə çıxmaq istədiyini bildirmişdi.