Azərbaycan Premyer Liqasının XIX turunun “Sumqayıt” – “Zirə” oyunundan (2:3) oyunundan sonra meydan sahibi komandanın baş məşqçisi Saşa İliç jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Maraqlı oyun oldu, gözəl qollar vuruldu. Yekunda uduzduq.

– Bu gün müdafiədə pis çıxış etdiniz. Arxa xəttdə dəyişiklik etməyiniz nəylə bağlı idi?
– Paşayevi təbrik edirəm. Bu gün qəşəng oynadı. Gələcəkdə klub üçün önəmli oyunçu ola biləcək. Məğlubiyyətin müdafiə ilə bağlı olduğunu düşünmürəm. Rayanın mövqeyini dəyişdik. Standart vəziyyətlərdə bizə lazım idi. Yorğun görünməyi normal idi. Deməzdim ki, müdafiəyə görə uduzduq. İlk qol müdafiənin səhvi deyildi. 2-ci qol cərimə zərbəsindən gəldi. 3-cüdə müdafiənin səhvi ola bilər.

– 2 fərqli hissə gördük. 2-ci hissədə daha fəal oynadınız. Səbuh Abdullazadənin əvəzlənməsindən sonra komandada effektivlik artdı. Rəqib baş məşqçi də bunu etiraf etdi. Səbuhinin performansında eniş yaşaması nəylə bağlıdır?
– Səbuhi komanda üçün önəmli oyunçudur. Bu gün özü də bildirdi ki, narahatlığı var. Temperaturu ola-ola meydana çıxmışdı. Gücünü göstərə bilmədi. Amma yenə deyirəm, bizimçün vacib oyunçudur.

– Rüstəm Əhmədzadə son oyunlarda ehtiyatda qalır. Bu, taktiki qərardır, ya onun performansı aşağıdır?
– Rüstəm də komanda üçün vacib oyunçudur. Zədəsi var idi və bir həftə məşqdən kənarda qalmışdı. Formasını yığmasına vaxt lazımdır. Bu həftə durumuna baxacağıq, yaxşı olsa, gələn oyun startda olacaq.

– Ehtiyat qüvvəniz kasaddır. Bu, avrokuboklar üçün oynayan komandaya nə dərəcə təsir edəcək?
– Hazırda 2 oyunçumuz zədəlidir. Onlar da oyuna qoşulsa, rahat ola bilər. Bu heyətdən maksimum istifadə etməyə çalışacağıq.

– Komandanızın performansında eniş hiss edirsiniz? Təlim-məşq toplanışında da məğlubiyyətlər oldu. Rəqibləri düzgün seçmədiyinizi düşünürsünüz?
– Toplanışda özümüzdən güclü rəqibləri seçmək mənim fikrim olub. Ordakı nəticələr vacib deyil. Düşünmürəm ki, toplanışımız zəif keçib.