17 yaşadək futbol millimiz (U-17) yenidən Belarusun paytaxtı Minskdə keçiriləcək "İnkişaf Kuboku" turnirində yarışacaq.

Prosport.Az-ın xəbərinə görə, 19-23 fevral aralığında keçiriləcək turnirdə Aqil Nəbiyevin baş məşqçisi olduğu komanda B qrupunda mübarizə aparacaq.

Rəqiblər Belarus U-16-sı, Rusiya və Özbəkistan U-17-ləri olacaq. A qrupunda isə Belarus, Minsk millisi, Qazaxıstan və Tacikistanın U-17 komandaları yarışacaq.

Yığmamızın oyun qrafiki də bəllidir. Bakı vaxtı ilə oyunların tarixini təqdim edirik:

19 fevral
13:50 Azərbaycan U-17 – Rusiya U-17

20 fevral
14:20 Azərbaycan U-17 – Özbəkistan U-17

21 fevral
16:40 Belarus U-16 – Azərbaycan U-17

Turnirdə 22 fevral istirahət günüdür. 23 fevralda isə qruplarda eyni sıranı tutan komandalar bir-birləri ilə qarşılaşacaq. 

Qeyd edək ki, U-17 millimizin Belarusa gedəcək heyəti sabah bilinəcək.

Xatırladaq ki, 2024-cü ildə U-17 millimiz bütün görüşlərdə uduzaraq sonuncu – 8-ci olmuşdu. Ötən il isə yığmamız 4-cü yerlə kifayətlənmişdi. Hər 2 halda komandaların baş məşqçiləri İlham Yadullayev olub.