"Quba" Azərbaycan Basketbol Liqasının XVI turunda evdə "Sərhədçi"yə 97:89 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi nəticəni şərh edib.

Şəhriyar Əsgərov ("Quba"): "Bu oyunda qalib gəldik. 20 xal irəlidəydik. Sadəcə sona yaxın yorğunluq oldu. 8 xal fərqlə qalib gəldik. Oyunu əsasən müdafiə üzərindən vurduq. Rəqibin bir oyunçusu da zədəli idi. Yəqin ki, qələbə qazanmağımızın səbəbi də o idi. Həmin oyunçu olsaydı, “Sərhədçi” güclü olardı. Anar müəllim gözəl məşqçidir, sevdiyim məşqçilərdən biridir. Sonadək mübarizə apardılar. Əlini-qolunu sallayıb məğlubiyyətlə barışmadı. Buna görə də ona təşəkkür edirəm. Bu, rəqibə də hörmət əlamətidir. Oyunçularımdan xüsusilə yerli, gənc basketbolçuların - Hüseyin Məmmədovun və Ayxan Aslanovun performansını qeyd etmək istəyirəm. Legioner oyunçularımız isə demək olar ki, möhtəşəm idi. Yeni 4+1 formatında oynamaq isə qürurverici idi”.

Anar Sarıyev (“Sərhədçi”): “Oyundan çox şey danışmaq istəmirəm. Həm müdafiədə, həm hücumda primitiv səhvləri çox etdik. Onun ucbatından fərq 20 xala gəlib çıxdı. Oyunu öz tərəfimizə keçirtmək çətin oldu. “Quba”nı qələbə münasibətilə təbrik edirəm. Biz də çalışacağıq ki, digər oyunlarda yaxşı çıxış edək”.