Azərbaycan Basketbol Liqasının XV turunda "Gəncə" "Şəki"yə 95:80, "Neftçi" NTD-yə 98:82 hesabı ilə qalib gəlib.
Prosport.Az xəbər verir ki, matçlardan sonra komandaların baş məşqçiləri öz fikirlərini bölüşüblər:
Halil Atlı ("Gəncə"): "Rəqibi mübarizə əzminə görə təbrik edirəm. Öz oyunçularıma da "sağ ol" düşür. Çünki sıx təqvimdən uğurla çıxdıq. 3 həftəlik dövrü istirahət etmədən keçiririk. Səfərdə, evdə oynadıq. Doğrudan da çətin durum idi. Bu mərhələni uğurla dəf etmək bizim üçün önəm daşıyırdı. Son tura daxil oluruq. Göstərdiyimiz oyunu ən yaxşı hala gətirmək üçün çalışmağa davam edəcəyik. Basketbolçularımdan çox məmnunam. Hamısının əziyyətini qiymətləndirirəm. Son mərhələdə də çatışmazlıqları aradan qaldırıb ən yaxşı şəkildə oyun nümayiş etdirmək üçün səylərimizi davam etdirəcəyik".
Bedri Meriç ("Şəki"): "Ümumiyyətlə, pis basketbol oynamadıq. Rəqibimiz yaxşı hücum günündə idi. Biz 3-cü periodda oyundan pis qopduq. Üstəlik, faul problemləri yenə canımızı yandırdı. Rəqibimiz həm yerli, həm də legioner baxımından zəngin heyətə malik olduğundan, geniş rotasiya ilə oynadı. Ancaq təəssüf ki, bu bizim üçün mümkün olmur. Yenə də son periodda basketbolçuların oyundan qopmadan verdiyi mübarizədən razıyam. Hədəfimiz bəllidir. A qrupunda ən aşağı heyətlə biz mübarizə aparırıq. Rəqiblərimiz isə əlavə oyunçular gətirir. Amma bu bizim məqsədimizə çatmağımıza mane deyil. Mən oyunçularıma güvənirəm. Son dövrədə 5 matçımız qaldı və ən azı 2 qələbə qazana bilərik. Bu da qrupda yerimizi müəyyənləşdirəcək. Bu matçların nəticəsinə baxmadan artıq öz oyunumuzdakı çatışmazlıqları ən yaxşı şəkildə aradan qaldırıb pley-inə hazır getməliyik".
Tahir Baxşıyev (NTD): "Oyuna yaxşı başladıq və matçı böyük fasiləyə qədər pis keçirmədik. Amma sonra zəif oynadıq. Oyun haqqında deməyə xüsusi bir sözüm yoxdur. “Neftçi” yaxşı komandadır. Onları qələbə münasibətilə təbrik edirəm".
Vitali Stepanovski ("Neftçi"): "Komandamızı dəstəkləyən hər kəsi ürəkdən təbrik edirəm. Oyunçularıma göstərdikləri münasibətə görə təşəkkür edirəm. Bu qələbədən sonra yaranan müsbət əhval-ruhiyyə həqiqətən vacib idi. Oyuna gəlincə isə, inkişaf etmək və irəliləmək üçün daha da təkmilləşdirə biləcəyimiz çox şey var. İlk növbədə, top itkilərini minimuma endirməli və rəqibin səhvlərindən daha yüksək effektivliklə istifadə etməliyik".