Azərbaycan Taekvondo Federasiyası çətinliklə üzləşib.

Prosport.Az-ın xəbərinə görə, federasiya prezidenti, fövqəladə hallar naziri Kəmaləddin Heydərova məxsus olan 4 ulduzlu "Qafqaz Park Hotel"in adı 2024-cü ildə keçirilmiş COP29 öncəsi "Kaspia Park Hotel"ə dəyişdirilib. Bununla da Xətai prospekti 51-də yerləşən hotel əl dəyişib.

Beləliklə, federasiya həmin vaxtdan ofisindən çıxarılıb. O vaxtdan federasiya Kəmaləddin Heydərovun 2015-ci ildə tikdirdiyi Azərbaycan Boks Federasiyasının inzibati binasına – Bakı Boks Mərkəzinə köçüb. Xatırladaq ki, K.Heydərov həmin vaxt həm də Boks Federasiyasının prezidenti olub.

Bununla belə, Taekvondo Federasiyasının idman zalı sözügedən hoteldə qalırdı. Hotel rəhbərliyi federasiyaya özünə idman zalı tapmağı tapşırmışdı. Artıq vədə dolub.

Bu aydan taekvondoçular bu idman zalından da çıxarılıb. Hazırda federasiya məşq etmək üçün idman zalı tapmaqda çətinlik çəkir. Böyüklər və gənclərdən ibarət taekvondo millilərinin təlim-məşq toplanışını Bakıda yox, Şəki Olimpiya İdman Kompleksində keçirməsi də məhz bu səbəbdəndir.

Hazırda federasiya Abşeron Olimpiya İdman Kompleksi və ya Xətai rayonunda yerləşən "Nargilə" kafesi kimi adlanan ərazidə idman zalını özünə götürmək istəyir. Lakin hər iki zalın şəhərdən uzaqda yerləşməsi bir qədər tərəddüdə səbəb olub.

Murad