"Naxçıvan" Azərbaycan Basketbol Liqasının XV turunda "Quba"ya 82:70 hesabı ilə qalib gəlib.

Prosport.Az xəbər verir ki, hər iki komandanın baş məşqçisi oyunla bağlı fikirlərini bölüşüb.

Nikola Bozinoski ("Naxçıvan"):  “İlk olaraq qələbə münasibətilə komandamı təbrik edirəm. Xüsusilə bildirmək istəyirəm ki, bəzi anlarda hakimlər oyunun önünə keçməyə çalışdılar. Həyatımda bu cür hakimlər və belə idarəetmə görməmişəm. Çox pis performans sərgilədilər. Ümid edirəm ki, özləri bu oyunu yenidən izləyəcəklər. Qalibiyyətə gəlincə isə komandam yaxşı çıxış etdi. Bütün dediklərimi yerinə yetirdilər. Növbəti matça köklənəcəyik.

Şəhriyar Əsgərov ("Quba"): "Sona qədər mübarizə apardıq. Sadəcə sonda uduzduq. Yenə də məsələ ehtiyat skamyanın zəif olması, hündür oyunçumuzun olmamasıdır. 3-cü hissənin ortalarında və 4-cü hissədə oyunçuların sanki kondissiyaları aşağı düşdü. "Naxçıvan"ı təbrik edirəm. Bizə qarşı çox güclü oynadılar. Görünür, kubokdakı oyundan nəticə çıxarıblar. Oyunçularıma nə deyə bilərəm? Oynadılar və bu qədərinə gücümüz çatdı. Belə oyunları 6-7 basketbolçu ilə qalib başa vurmaq olmur. Növbəti matçlara hazırlaşacağıq. Mübarizəyə davam edirik. Görək, sonda necə olacaq".