"Quba" Azərbaycan Basketbol Liqasının XIV turunda evdə "Lənkəran"a 86:68 hesabı ilə qalib gəlib.

Prosport.Az xəbər verir ki, hər iki komandanın baş məşqçisi qarşılaşma ilə bağlı fikirlərini bölüşüb:

Georgi Kondruseviç ("Lənkəran"): "Rəqibi qələbə münasibətilə təbrik edirəm. 4-cü periodda Quba komandasının gənc oyunçularını parketdə görmək çox x1oş idi, onlar özlərini layiqincə göstərdilər. Bizim oyuna gəlincə, hər şey aydındır. Son dərəcə məhdud heyətlə ardıcıl 4-cü oyunu keçirməyimiz öz təsirini göstərir. Normal məşq prosesi yoxdur və oyunçular çox böyük yük altındadırlar. Aydındır ki, artıq xeyli yığılmış yorğunluq da öz sözünü deyir. Kapitan Orxan Abbasovun “Naxçıvan”la oyunda ayağında problemi olmuşdu, indi də eyni səbəbdən bizə kömək edə bilmədi. Növbəti oyunlarla bağlı onun vəziyyəti hələlik bəlli deyil”.

Şəhriyar Əsgərov ("Quba"): "Bu oyunun proqnozunu əvvəldən demək olardı. Çünkü “Lənkəran” böhran yaşayır. Komanda tam heyətlə çıxış etmir. Ümid edirəm ki, onlar yaxın zamanda bu böhranı geridə qoyacaqlar. Buna görə də oyun asan alındı. Bir xeyiri də oldu ki, oyunçulardan tam istifadə edə bildik. Hüseyn Məmmədov, Ayxan Aslanov və Ülvi Məmmədov oyuna girib özlərini göstərə bildilər. Çox da çətin olmayan qələbə qazanmaq nəsib oldu. Rəqibi də təbrik edirəm. Heyətində çətinlik olmasına baxmayaraq sona qədər çox güclü müqavimət gostərdilər. Uğurlarımızın davamı gələcək. Umid edirəm qələbə seriya olar".