"Komandamı təbrik edirəm. Oyunçularım son saniyələrə qədər döyüşdü. Onlar bu gün qəhrəmanlıq etdi".

Prosport.Az xəbər verir ki, bu sözləri "Sumqayıt"ın baş məşqçisi Vadim Kuramşın Azərbaycan Basketbol Liqasının XIV turunda səfərdə "Ordu"ya 100:96 hesabı ilə qalib gəldikləri oyundan sonra deyib.

Mütəxəssis rəqibin həqiqətən də güclü komanda olduğunu bildirib: "Həmişə yüksək səviyyədə basketbol oynayırlar. Bu dəfə biz onların oyununu oxuduq və qalib gəldik Son vaxtlar yüksəlişdəyik. Kubokda NTD-ni məğlub etməklə enerji topladıq və bu, artıq bizim ardıcıl 3-cü qələbəmizdir. Doğrudur, bir az sıx təqvimlə üzləşmişik, ümid edirəm ki, tempi qoruyub saxlayacağıq. Mövsümdə hədəflərimizə gəlincə, mümkün qədər yüksək yerlər tutmaq arzusundayıq. Hazırda 3-cü sırada qərarlaşmışıq və bu uğurlu nəticəni pley-in və pley-offda da davam etdirmək istəyirik".