"Sumqayıt" Azərbaycan Kubokunun 1/8 final mərhələsində NTD-yə 116:94 hesabı ilə qalib gələrək növbəti mərhələyə yüksəlib.

Prosport.Az xəbər verir ki, matçdan sonra hər 2 komandanın baş məşqçisi görüşlə bağlı fikirlərini bölüşüblər.

Vadim Kuramşın ("Sumqayıt"): "Uşaqları qələbə münasibətilə təbrik edirəm. Onlar bu gün möhtəşəm oynadılar. Nəzərə alaq ki, biz kubokun son qalibini mübarizədən kənarlaşdırdıq. Bu gün oyun qurucumuz Keon Klerqot 50 xal toplayaraq həm klub tarixinin, həm də bu mövsüm liqa oyunçularının məhsuldarlıq rekordunu yenilədi. Ümid edirəm ki, növbəti matçlarda da bu tempi qoruyacağıq. 1/4 finalda "Ordu" ilə qarşılaşacağıq. Bu komandanı tanıyırıq, zəif və üstün cəhətlərini bilirik. Bu oyuna hazırlaşacagıq. Amma bundan əvvəl biz həftəsonu çempionatda "Quba" ilə üz-üzə gələcəyik. Həmin oyunda qalib gəlmək istəyirik".

Tahir Baxşıyev (NTD): "Oyunla bağlı xüsusi deyəcək sözüm yoxdur. Çox zəif oynadıq. Göstərməli olduğumuz oyunu nümayiş etdirə bilmədik. Rəqibi qələbə münasibətilə təbrik edirəm və kubokda onlara uğurlar arzulayıram".