“Azərbaycanda çalışdığım 6 il ərzində burada böyük təcrübə və yaxın dostlar qazandım. Bu müddət ərzində mən və məşqçilər korpusum həm federasiya, həm də güləş azarkeşlərindən böyük dəstək gördük".

Prosport.Az xəbər verir ki, bu sözləri yunan-Roma güləşi üzrə Azərbaycan millisinin baş məşqçisi postunu tərk edən Aleksandr Tarakanov deyib.

Rusiyalı mütəxəssis ayrılığın səbəbini açıqlayıb: "Bəzən məşqçilik karyerasında yeni bir mərhələyə adlamaq üçün fasilə götürmək, keçmiş təcrübələri yenidən nəzərdən keçirmək lazım olur. Bir qədər istirahət etmək, ailəmlə zaman keçirmək bu yolda mənə çox böyük dəstək olacaq. Bu səbəbdən qarşılıqlı razılaşma ilə əməkdaşlığı başa vurduq". 

A.Tarakanov fürsətdən istifadə edərək, federasiya rəhbərliyinə, onunla çiyin-çiyinə çalışmış məşqçi yoldaşlarına və komandanın hər bir üzvünə təşəkkürünü bildirib: "Gələcəkdə nə zaman ehtiyac duyularsa, Azərbaycan güləşinin inkişafı yolunda əmək sərf etməyə hazıram”.