"Abşeron Layns" Azərbaycan Basketbol Liqasının XI turunda "Şəki"ni 107:82 hesabı ilə məğlub edib.

Prosport.Az xəbər verir ki, qarşılaşmadan sonra hər iki komandanın baş məşqçisi öz fikirlərini bölüşüb.

Ərhan Tokər ("Abşeron Layns"): "Mövsümün əvvəli ilə müqayisədə komanda kimi formalaşmış durumdayıq. Hər kəs parketdə bir-birini anlayır və kömək edir. Yaxşı və ya pis oynasaq da, basketbolçular nə etmək istədiklərini bilirlər. Rolları tam oturub deyə bilərəm. Bu baxımdan biz artıq son zamanlar bəlli bir oyun strategiyasını nümayiş etdirə bilirik. Bu gün "Şəki" ilə görüşdə yaxşı müdafiə olunduğumuz vaxtda xallar ard-arda gəldi. Müdafiədə axsayanda isə hücumda da kəsərli ola bilmirdik. Bu oyunda, misal üçün, fasilədən sonra oyunumuz pis getdi, lakin sonra toparlana bildik. Bunun başqa səbəbləri də var. Böyük fasiləyə çox xal fərqi ilə yollanmışdıq. Oyunçularda bir qədər arxayınlıq yarandı. Dediyim kim,i sonra yenidən toparlana bildilər. Mövsümün əvvəlinə qayıtsaq, FIBA Avropa Kubokuna, demək olar ki, hazırlıqsız getmişdik. Bəzi oyunçular gec gəldi, təlim-məşq toplanışı olmadı və s faktorlar təsir etdi. Qarşıdakı mövsümdə bütün bunları daha planlı etmək istəyirik. Dolayısı ilə biz bir tərəfdə avrokuboklarda oynayarkən, yerli çempionatda yalnız 6 və ya 7-ci turda tam olaraq komandanı normal oyun formasına gətirə bildik. Hazırda isə hər şey istədiyimiz kimidir. Basketbolçularım hər oyuna istəklə çıxır və qələbə qazanırlar. Durumdam məmnunam. Qarşıda bizi istirahət gözləyir. Qalan oyunçularla məşqlərimizi davam etdirəcəyik. Fasilədə bir oyunçumuz - De Sin Eiksen komandadan ayrılacaq. Onunla şəxsi səbəbdən, qarşılıqlı razııaşma ilə yolları ayırırıq. Rüstəm Əliyev zədəli olduğu üçün Rəsul Məmmədzadə heyətə qoşulub. Daha bir oyunçu transfer edəcəyik. Bir sözlə, fasilədən sonra da özümüzü toparlayıb yolumuza uğurla davam etmək istəyirik".

Bedri Meriç ("Şəki"): "Rəqibimizi təbrik edirəm. Onların xüsusən 3 xallıq atışlarda yaxşı olduğunu bilirdik, amma matçın əvvəlində müdafiədə heç müqavimət göstərə bilmədik. 6 gündə 3-cü matçımızı oynadıq. Həm yorğunluq, həm də zədələrə görə kasad heyətlə oynamaq çətin oldu. Qarşıdakı fasilə bizə yaxşı gələcək. Fasilədən sonra tam heyət olacağıq. Həm də çatışmazlıqlarımızın üzərində çalışacağıq. A qrupunda yenilmək bizə sürpriz deyil, vacib olan hədəfdən vaz keçməməkdir. Yıxılsaq da, qalxıb mübarizəyə davam etməliyik. Hamının Yeni ilini indidən təbrik edirəm. Ümid edirəm ki, 2026-cı il hamıya sağlamlıq və uğur gətirər".