"Şərhədçi" Azərbaycan Basketbol Liqasının XI turunda "Quba"ya 97:78 hesabı ilə qalib gəlib.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüb.

Anar Sarıyev ("Sərhədçi"): "Layiqli qələbə qazandıq. İlk 2 hissədə yaxşı oynamadıq, amma son iki hissəni toparlandıq, meydanda yaxşı basketbol göstərdik. Komandanın hər bir üzvünə təşəkkür edirəm ki, bu ili 3-cü yerdə bitirə bildik. Amma bu, son deyil. Bizim üçün hələ başlanğıcdır. Komanda 3-cü dövrədə daha güclü və istəkli olmalıdır. Biz məşqlərimizə davam edəcəyik. Sonra komandaya istirahər verəcəyik. Yeni ildən sonra hazırlaşıb “Lənkəran”la matçı düşünəcəyik. Ümid edirəm ki, yeni il həm “Sərhədçi”, həm oyunçular üçün düşərli olar”.

Şəhriyar Əsgərov ("Quba"): "Əcnəbi oyunçulara nəsə deyə bilmərəm. Bacardıqlarını etdilər. Görünür ki, ondan artığını etməyə də gücləri çatmadı. Yorğunluq da özünü göstərdi. Məsələn bençdən meydana girən yerli oyunçuların zəif təsir bağışlamasıdır. Səhvlərə yol verdilər. Zaur Paşayevin yoxluğu aşkar göründü. Amma belə olmamalıdır. Meydana daxil olan yerli gənclərimiz özlərini göstərməlidir, onlar üçün yaxşı şans yaranıb ki, oynasınlar. Əslində bu, yığma və klubların baş məşqçiləri üçün ciddi siqnaldır. Yerlilərimizin zəif performans göstərməsini qeyd edirəm. Özü də milli üzvlərinin. "Sərhədçi"ni təbrik edirəm. Anar Sarıyev çox istədiyim məşqçilərdən biridir. Yeni il münasibəti ilə də onları təbrik edirəm. 

Qışa qədər olan çıxışımıza gəldikdə, hardasa 6 qələbə qazanacağımızı gözləyirdik. Məsələn, "Sərhədçi" üzərində 2 qələbə gözləyirdik. "Lənkəran"a uduzmaya bilərdik. Hazırda 3-cü pillədəyik, sürüşkən yerdir. 1 xal fərqi ilə orada qərarlaşmışıq, "Sərhədçi" ilə xallarımız bərabərləşdi. Yeni ildən heç olmasa, 5 oyundan 3-də qələbə qazanmalıyıq. Pley-off mərhələsinə son pillədən çıxmamağa çalışacağıq. Basketbol, idman camiəsini, xalqımızı Dünya Azərbaycanlılarının Həmrəyliyi Günü və Yeni il münasibəti ilə təbrik edirəm".