"Sabah" Azərbaycan Basketbol Liqasının X turunda "Abşeron Layns"a 97:101 hesabı ilə uduzub.
Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.
Ərhan Tokər ("Abşeron Layns"): "Əslində biz ötən həftə keçirilən oyunlardan sonra 2-ciliyi təmin etmişdik. Bu həftə isə istədiyimiz məşqləri edə bilməmişdik. Son oyundan sonra Ceyms Freyzer zədə səbəbi ilə məşq edə bilmirdi. 2-3 gün öncə də Sadettin Donat zədələndi. Buna görə bizim üçün də hazırlıq prosesi fərqli oldu. Oyun da eynilə. Yararlana biləcəyim oyunçular baxımından söyləyirəm. Rəqib də, mənə elə gəlir, bu oyunçularla oynayacağımızı gözləmirdi. Onlar həmçinin avrokuboklarda mübarizəni dayandırıb. Bəlkə motivasiyaları aşağı olar deyə düşünmüşdük. Oyunun böyük bir hissəsi bərabər mübarizə şəraitində keçdi. Fərqin böyüməsinə icazə vermədik. Oyunçularım çox yaxşı mübarizə apardı. Parketdə olan bütün oyunçularım komandaya fayda verə bildi. Komanda oyunu göstərdik. Onları təbrik edirəm. Qarşıda bizi "Şəki" ilə oyun gözləyir. Sırada bu oyuna hazırlıq var. Daha əvvəl də demişəm ki, biz hər zaman qələbə üçün oynayırıq. Amma başa düşürük ki, məğlubiyyətlər də qaçılmaz deyil. Hər qarşılaşmada çətin situasiyalarda həll yolu axtarırırq və bu gün bunu tapa bildik.
Hakimlər ilk dəqiqələrdən güzəştə getməyəcəklərini göstərirdi. Onlar nə gördülərsə, fiti səsləndirdi. Bəzən bizim əleyhimizə, bəzən rəqibin. Nəticəyə çox təsir etdiklərini düşünmürəm. Biz yaxşı oynadıq, yaxşı hücum edib, yaxşı müdafiə olunduq. Hər zaman belə gərgin oyunlarda nəticə sonda hakimin üzərində qalır. Fikir versəniz, oyunun böyük bir hissəsində komandamıza qarşı tez-tez referilər foul qeydə alırdı. Buna etiraz edirdim və mən də xəbardarlıq aldım. Oyunun sonunda stepslər mənə görə düzgün qərar idi. Bəlkə texniki foullar müzakirə oluna bilər. Amma orada da kim danışdısa, etiraz etdisə, içi mən daxil, hər kəs foul aldı. Oyunun sonunda sadəcə bizim heyətdə Orelik Qediminasın atışları əla oldu və Freyzerlə birgə sonluğu əla gətirdilər. Vəssalam, bu bizi qələbəyə apardı.
Nicat Məmmədli mövsümün əvvəlindən çox çalışırdı. Sadettin Donat milli oyunçusu olduğundan və çıxışı bizi qane etdiyindən, əsas oyunçu kimi parketdə olurdu. Amma bir daha deyirəm ki, Nicat da hər zaman hazır idi. Bu dəfə zədə səbəbindən Donat olmadı və Nicat Məmmədli şansından əla istifadə elədi. Tək ona yox, digər bütün yerlilərə də güvənirəm və mən onlara hər zaman şans verməyə hazıram. Əsas onlar hər zaman özlərini hazır hiss etsin".
Rimas Kurtinaytis ("Sabah"): "Bəzi hissələrdə yaxşı, bəzilərində isə pis oynadıq. Bu da yorğunluqla bağlıdır. Amma bununla yanaşı, bugünkü oyunda qeydə alınan nəticədə böyük pay sahibi hakimlər oldu. Çempionlar Liqasında böyük komandalara qarşı mübarizə apardıq. Azərbaycan çempionatında isə rəqiblər bizə qarşı yüksək motivasiya ilə oynayır. Təbii ki, qarşılaşdığımız bütün rəqiblər bizə qalib gəlmək istəyir. Hakimliklə bağlı bəzi məsələlər var ki, susmaq olmur. İlk olaraq hakimlərdən birinin oyuna gecikməsinə baxmayaraq, görüşün daha öncə təyin olunan vaxta keçirilməsinə razılıq versəm də, bu məqam mənə qaranlıq qaldı. Artıq neçənci oyundur ki, hakimlərin bizə qarşı kobud səhvləri və müəmmalı qərarları ilə üzləşirik. Yerimdən qalxaraq hakimə verdiyi qərarla bağlı sual vermək istəyəndə texniki foul alıram. Halbuki hakim sualı bəlkə tam və aydın eşitmədi. Üstəlik mən artıq illərdir ki, basketboldayam və bilirəm ki, hakimə hansı sözü demək olar, hansı sözü yox. Bəzi qərarlarına baxdıqda, sanki oyunda olmadıqlarını hiss etmək olar. Düşünürəm ki, komandalarla yanaşı, hakimlik də liqanın səviyyəsinin qalxmasında çox vacib rol oynayır. Oyunlar obyektiv və neytral idarə olunmalıdır. Bizim klub olaraq məqsədimiz keyfiyyətli iş ortaya qoyaraq Azərbaycan basketbolunun inkişafına öz töhfəmizi verməkdir. Mən də yenidən Azərbaycana bu məqsədlə qayıtmışam. Düşünürəm ki, federasiya bu oyundan sonra bu cür halların bir daha təkrarlanmaması üçün hakimliklə bağlı ciddi qərarlar qəbul etməlidir".