"Hər şeydən öncə komandamı təbrik edirəm, bu gün müdhiş mübarizə ortaya qoyduq. Hamını bir-bir təbrik edirəm. Ceykob Vayli xəstə olaraq oynadı. Ona xüsusi minnətdaram. Çox mübarizə apardı".

Prosport.Az xəbər verir ki, bu sözləri "Gəncə"nin baş məşqçisi Halil Atlı Azərbaycan Basketbol Liqasının X turunda səfərdə "Şəki" 78:73 hesabı ilə qalib gəldikləri oyundan sonra deyib.

Türkiyəli mütəxəssis bildirib ki, rəqib həm evdə, həm səfərdə çox mübarizə aparan komandadır: "İlk matçda öz səhvlərimizdən, konsentrasiyasız oynamağımızdan dolayı istəmədiyimiz halda məğlub olmuşduq. Bu oyunda daha çox mübarizə apardığımızı düşünürəm. Ona görə bir daha kollektivə minnətdarlığımı bildirirəm".

Halil Atlı "Sabah"la təxirə salınan görüşə də toxunub: "2 gün sonra meydana çıxacağıq. Üst-üstə səfərlərdəyik. Hardasa Avrokuboklarda çıxış edən klublardan daha sıx təqvimdə oynayırıq. Bu bizi çox çətin vəziyyətə salır. Amma Bakıda da ən yaxşı şəkildə mübarizə aparıb ili yaxşı nəticə ilə başa vurmaq istəyirik".