"Məğlub olduğumuz üçün çox məyusuq. Amma oyunçularımın mübarizəsindən və göstərdikləri oyundan razıyam".

Prosport.Az xəbər verir ki, bu sözləri "Şəki"nin baş məşqçisi Bedri Meriç Azərbaycan Basketbol Liqasının X turunda "Gəncə"yə 73:78 hesabı ilə uduzduqları oyundan sonra deyib.

Türkiyə mütəxəssis qarşılaşma ilə bağlı fikirlərini bölüşüb: "Son 2 matçdır ki, hesabda öndə olduğumuz oyunda bəsit səhvlərlə uduzuruq. Amma doğru yoldayıq. Səhvlərdən nəticə çıxarıb, mövsümün sonunda hədəfimiz olan pley-offa çıxacağımıza inamım çoxdur".

Baş məşqçisşnin sözlərinə görə, 2 matçdır ki, son periodda uduzmaqları kapitan Samir Stuartın oynamaması ilə bağlıdır: "Oyunun ritminə sonda nəzarət edə bilmirik. Üstəlik kasad heyətlə oynadığımızdan, basketbolçular yorulur. Bu səbəbdən təəssüf ki, matçın sonlarında sürət tempimiz aşağı düşür".

"Matçlarda bu gün qalib gəlmək, sabah uduzmaq olar. Nəticələr həmişə dəyişə bilər. Amma həyatda düzgün insan olaraq qala bilmək önəmlidir. Həmişə nəticədən asılı olmayaraq, insanlığımızı qoruya bildiyimiz üçün komandamla fəxr edirəm”, - deyə B. Meriç fikirlərini tamamlayıb.