"Naxçıvan" Azərbaycan Basketbol Liqasının X turunda "Quba"ya 78:69 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Şəhriyar Əsgərov ("Quba"): "Yaxşı oynadığımızı düşünürəm. "Naxçıvan" kimi komandaya 80 xal atmağa imkan vermədik. Bu gün rəqib bizdən güclü oynadı və uduzduq. Rəqib Kristian Kunsu zərərsizləşdirmişdi və Zaur Paşayevə də basqı qururdu. Ümumilikdə sona qədər mübarizə apardıq. Təbii ki, bu oyun geridə qaldı və yolumuza davam edirik. Qələbə qazanmaq üçün yenə də sona qədər oynayacağıq".

Nikola Bozinski (“Naxçıvan”): "İlk olaraq “Quba” kollektivini təbrik edirəm. Rəqib oyunun sonuna kimi yaxşı mübarizə apardı. Qarşılaşma ərzində 3 xallıq atışlarda zəif performans göstərdik. Tez-tez rotasiyalar etdik. Bunun səbəbi də ehtiyyatda yetəri qədər yaxşı oyunçularımızın olmasıdır. Həmçinin ilk "5-liy"imiz matç ərzində çox enerji sərf etdiyi üçün bu yola əl atmalı oldum. İlk yarıda rəqib basketbolçu Alonzo Reync 15 xal toplamışdısa, fasilədən sonra matçda yer alan bütün oyunçularım müdafiədə yaxşı çıxış edərək onu dayandıra bildilər. Hücum ribaundlarını götürməkdə çətinlik çəksək də, yekunda qələbə qazanmağı bacardıq".