"Naxçıvan" Azərbaycan Basketbol Liqasının IX turunda səfərdə "Sərhədçi"yə 90:74 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Nikola Bozinoski ("Naxçıvan"): "Sərhdəçi" komandasını təbrik edirəm. Əla oyun oynadıq, ilk hissə bərabər keçsə də, daha sonra üstünlüyü ələ almağı bacardıq. 2-ci hissədə də komandamız təşəbbüsü əldən vermədi. Oyun ərzində çoxlu rotasiyalar etdik, ona görə də oyunçularımız görüşün sonuna kimi daha enerjili vəziyyətdə qaldı. Bütün komandanı təbrik edirəm".

Anar Sarıyev ("Sərhədçi"): "İlk 2 hissəni pis oynamadıq. Meydanda mübarizə apardıq. 3-cü hissədə sanki komanda bir az "sındı". Çox sadə səhvlər etdik. 4-cü hissənin əvvəlini yaxşı oynadıq. Amma sonunu gətirə bilmədik. Artıq 2-ci dövrənin sonuna yaxınlaşırıq. Hələ də mən komandamdan istədiyimi ala bilməmişəm. Sadəcə yenə də inanıram ki, gələcəkdə yaxşı olacaq. Oyunçularıma təşəkkür edirəm, lakin qələbə üçün istədiyimizi ala bilmədik”.