Azərbaycanın 2 boksçusu Beynəlxalq Boks Assosiasiyasının (IBA) keçirdiyi BƏƏ-nin Dubay şəhərində keçirilən dünya çempionatında finala çıxa bilməyib.

Prosport.Az xəbər verir ki, 92 kq çəki dərəcəsində yarışan Kuba əsilli boksçumuz, olimpiya mükafatçısı və dünya çempionu Loren Alfonso yarımfinalda özbəkistanlı Turabek Xabibullayevə məğlub olub – 0:5.

+92 kq-da yarışan Məhəmməd Abdullayev də yarımfinalda rusiyalı David Surova uduzub – 0:5. Bununla da Məhəmməd ardıcıl 3-cü dəfə IBA dünya çempionatının yarımfinalında – finalın bir addımlığında məğlub olub.

Yalnız kikboksinqlə də məşğul olan Sübhan Mamedov (48 kq) finala çıxmağı bacarıb. O, yarımfinalda Gürcüstan azərbaycanlısı Sahil Allahverdiyevi 5:0 məğlub edib. Bununla da o, finalda ötən ilin Avropa çempionu, Rusiya ermənisi Edmond Xudoyanla qarşılaşacaq. Dubay tennis stadionunda baş tutacaq final sabah keçiriləcək.

Qeyd edək ki, boksçularımız bu ilin sentyabrında İngiltərənin Liverpul şəhərində Beynəlxalq Olimpiya Komitəsinin tanıdığı Dünya Boks Federasiyasının keçirdiyi ilk dünya çempionatında da iştirak edib. Orada yalnız legionerlərimiz – özbəkistanlı Səidcəmşid Cəfərov (75 kq) və kubalı Loren Alfonso (90 kq) bürünc medal qazanıb. Azərbaycan bu nəticə ilə 68 ölkə arasında 19-cu olmuşdu.