"Oyun bizim istədiyimiz formada alındı. İlk hissədə Kristian Kuns yaxşı oynasa da, rəqib onu daha çox müdafiyə etməyə başladı. Bundan sonra digər basketbolçularımızın oyuna qoşulması nəticəsində matçın axarını dəyişə bildik".

Prosport.Az xəbər verir ki, bu sözləri "Quba"nın baş məşqçisi Şəhriyar Əsgərov Azərbaycan Basketbol Liqasının IX turunda "Lənkəran"l 95:87 hesabı ilə qalib gəldikləri matçdan sonra deyib.

Mütəxəssis rəqibin çox ciddi müqavimət göstərdiyini bildirib: "Bizə çətin anlar yaşatdılar. Amma Zaur Paşayev öz “dirijorluğ”u və oyunu oxumağı ilə müəyyən üstünlük yarada bildi. Rəqib bir neçə dəfə irəli keçməyi də bacardı. Amma həmin anlarda oyuna tez müdaxilə edib, üstünlüyü öz tərəfimizə keçirdik. Hansısa oyunçumuzu xüsusi qeyd etmək istəmirəm, çünki biz komanda kimi yaxşı oynadıq. Oyunçularımız çox yoruldu. Bu da rotasiya üçün yerli oyunçularımızın bir qədər hazır olmamasından irəli gəlir. Amma onlar da məşqlərdə çalışır".

O, yaxın zamanda daha geniş rotasiya ilə oynayacaqlarını vurğulayıb: "Onların məşqlərdə göstərdiyi performans bunu deməyə zəmin yaradır. Çalışacağıq ki, gənclərimiz də daha təcrübəli oyunçularımızdan nələrsə götürsünlər və oyuna töhfələrini versinlər. Qələbə seriyasını davam etdirmək istəyirik. Növbəti matçlara da qalibiyyət ruhu ilə çıxacağıq”.