FIBA Çempionlar Liqasının V turu çərçivəsində Bakıda keçirilən oyunda "Sabah" Çexiyanın "Nimburk" klubuna 107:85 hesabı ilə qalib gəlib.

Prosport.Az xəbər verir ki, oyundan sonra keçirilən mətbuat konfransında Bakı klubunun baş məşqçisi Rimas Kurtinaytis və basketbolçu Castin Tillman media önünə çıxıb. 

Əvvəlcə 18 xal toplayan amerikalı oyunçu fikirlərini bölüşüb: "Kənardan da göründüyü kimi, komandamız meydanda texniki cəhətdən bacarıqlarını maksimum göstərdi. Ribaundlarda, atışlarda yüksək çıxış etdik. Oyundan əvvəl belə hazırlaşmışdıq, qələbə istəyirdik. Bu oyun da bunu göstərdi. Oyundan-oyuna təcrübə yığaraq qələbə qazana bildik".

Litvalı baş məşqçi isə matçla bağlı bu sözləri söyləyib: "Azərbaycan basketbolu tarixində ilk Çempionlar Liqası qələbəsidir. Bəzi komandalar Avroliqadan Çempionlar Liqasında iştirak etməyə gəlib. Bir az bu qələbə gec oldu. Heyətimizdə itkilər vardı, bir basketbolçumuz komandaya gec qoşuldu. "Elan"a, "Alba"ya qarşı son oyunları xatırlasaq, qələbəyə yaxın idik. Klubu, rəhbərliyi, oyunçularımı təbrik edirəm. Son turda Berlində əlimizdən gələni etməliyik ki, qalib gələk".

Qeyd edək ki, "Sabah" ilk dəfə çıxış etdiyi Çempionlar Liqasının müntəzəm mövsümündə qrupda 6 xalla sonuncudur. Komandamızın qrup 3-cüsü kimi pley-inə vəsiqə qazanması üçün dekabrın 16-da qrup lideri "Alba"nı məğlub etməsi və "Nimburk"un "Elan"a uduzması lazımdır. .