"Quba" Azərbaycan Basketbol Liqasının VIII turunda "Sumqayıt"a 107:90 hesabı ilə qalib gəlib.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüb.

Şəhriyar Əsgərov ("Quba"): "Qalib gəldiyimiz üçün şadam. Yaxşı hazırlaşmışdıq. Amma çox çətin oyun oldu, heç də asan deyildi. Çünki 2-ci hissədə oyunçularımız kollektiv oyundan bir qədər düşdülər və fərdi oyuna üstünlük verdilər. Hər halda, yenə də toparlandıq və qalib gələ bildik. Kollektiv oyundur, heç bir basketbolçumuzu digərindən fərqləndirmək istəmirəm. Meydançada çox böyük vaxt keçirdilər. Arzu edərdim ki, digər yerli oyunçularımız da ustalıq səviyyəsini yüksəltsin, heç olmasa, onların da xidmətlərindən 10-15 dəqiqə istifadə edək. Ancaq təəssüf ki, "benç"də oturan oyunçuların bir çoxununun ustalıq səviyyəsi buna imkan vermir. Ümumilikdə komanda oyunu göstərdik. "Sərhədçi" ilə matçda olduğu kimi, basketbolçularımızın oyundan qopmasına imkan vermədik. Sonda da qalib gəldik. Azarkeşlərimizə təşəkkür edirəm ki, dəstək oldular. Qələbələrin davamını gətirmək istəyirik".

Vadim Kuramşın ("Sumqayıt"): "Çox bərbad oynadıq. Yeni oyunçumuz Cey-Cey Kolakon dünən ölkəmizə gəldiyinə görə bizə elə də fayda verə bilmədi. Demək olar ki, məşq etmədən meydana çıxdı. Problem ondadır ki, bu gün rəqibə 17 dəqiq "üçlük" atmağa imkan verdik. Xüsusən də, 3-cü periodda fərqi açmaqla oyunun taleyini həll etdilər. Məhz bu periodda 36 xal yığdılar. Biz isə cəmi 23 xal topladıq. Məğlubiyyətə görə günahkar özümüzük".