Azərbaycan Basketbol Liqasının VIII turunda "Naxçıvan" "Sərhədçi" İdman Mərkəzində "Lənkəran"a 82:75 hesabı ilə qalib gəlib.

Prosport.Az oyundan sonra hər iki komandanın baş məşqçisinin fikirlərini təqdim edir:

Georgi Kondruseviç ("Lənkəran"): “Rəqibi qələbə münasibəti ilə təbrik edirəm. Oyuna ciddi itkilərlə çıxmışdıq. Pərviz Mirzəyevdən sonra Azər Əzimovu da itirdik. Onda köhnə zədəsi yenidən özünü göstərdi. Azər 1 həftədən çoxdur ki, məşq prosesində iştirak etmir. Həmçinin ailəvi səbəblərə görə Raşed Dayson da ölkədən ayrılıb. Heyətin kasadlığı oyunun sonunda, həm hücumda, həm də müdafiədə buraxdığımız səhvlərdə özünü göstərdi. Amma komanda mübarizə apardı. Bunun üçün onlara təşəkkür edirəm”.

Nikola Bozinoski (“Naxçıvan”): "Matça yaxşı start verdik. Görüşün əvvəlində aqressiv və intizamlı idik. Lakin ilk əvəzetmələrdən sonra oyunumuzda geriləmələr oldu. Hücumda yaxşı çıxış etmədiyimiz anlarda rəqib bizi cəzalandırmağı bacardı. 2-ci hissədə isə həm hücumda, həm də müdafiədə istədiyimiz dərəcədə aqressivlik nümayiş etdirdik. Yekunda lazım olanı əldə edərək qələbə qazanmağı bacardıq".

Qeyd edək ki, B qrupunda "Naxçıvan" 14 xalla 2-ci, "Lənkəran" 11 xalla 3-cüdür.