"Qarabağ" futbol klubunun Akademiya komandaları yenidən Belarusun paytaxtı Minskdə keçiriləcək beynəlxalq turnirdə iştirak edəcək.

Prosport.Az-ın xəbərinə görə, "Qarabağ"ın 2012-ci il təvəllüdlü futbolçuları (U-14) 17-20 dekabr tarixlərində "Minsk Cup" turnirində yarışacaq.

Moskva ÇSKA-sı, Minsk "Dinamo"sunun da yarışdığı bu turnirdə 16 komanda 4 qrupa bölünüb. Komandamız A qrupunda mübarizə aparacaq. Rəqiblər "Meqasfera" (Moskva, Rusiya), "Minsk" və "FK 13" (Smolensk, Rusiya) olacaq.

Bundan başqa, "Qarabağ"ın 2016-cı il təvəllüdlü komandası (U-10) da "Bizim gələcək" adlı ənənəvi turnirdə mübarizə aparacaq. Hələ ki, bu yarışda "Qarabağ" və Minsk "Dinamo"sundan başqa, Rusiyanın 5 Olimpiya ehtiyatları idman məktəbinin komandasının çıxışı təsdiqlənib. Bu yarış 4-7 martda təşkil olunacaq.

Qeyd edək ki, 2024-cü ildə "Qarabağ"ın 3 yaş qrupu "Bizim gələcək" adlı turnirdə iştirak edib. Həmin ilin martında "Qarabağ"ın U-14 komandası (indiki U-15) finalda yerli BATE-ni 1:0 hesabı ilə məğlub edərək turnirin çempionu ola bilmişdi.