"Komandama, texniki heyətə təşəkkür edirəm. Doğrudan da ağır dövr yaşayırıq. Belə vəziyyətlərdə komanda olmaq çətindir. Məncə, sınaqdan keçirik".

Prosport.Az xəbər verir ki, bu sözləri "Gəncə"nin baş məşqçisi Halil Atlı Azərbaycan Basketbol Liqasının VIII turunda "Neftçi" ilə səfər oyunundan sonra deyib.

Türkiyə müətəxəssis 80:73 hesablı qələbəni şərh edib: "Kollektiv olaraq çox yaxşı oynadıq. Oyunçuları bir-bir təbrik edirəm. Rəqibimizə də mübarizəyə görə "sağ ol" düşür. Onlar ciddi rəqibdirlər, yaxşı heyətləri var. Avrokuboklarda yola davam etmək üçün potensialları vardı, amma bəxtsizliklə üzləşdilər".

O, 2 gün sonra Gəncədə "Neftçi" ilə təxirə salınan oyunda qarşılaşacaqlarını söyləyib: "Vaxtımız azdır, çatışmazlıqları aradan qaldırıb meydana ən hazır vəziyyətdə çıxacağıq".