"Milli komandanın oyunları ilə bağlı yaranmış fasilədən sonra ilk hissə bizim üçün həqiqətən yaxşı keçmədi, çünki çoxlu sayda top itkilərinə yol verdik. Birinci hissəni 6 top itkisi ilə tamamladıq və həmin top itkilərini rəqib asanlıqla 8 xala çevirdi. Bu da onların oyuna daha yaxşı daxil olmasına və ilk hissədən sonra 7 xallıq fərqlə öndə olmalarına səbəb oldu".

Prosport.Az xəbər verir ki, bu sözləri "Neftçi"nin baş məşqçisi Vitali Stepanovski Azərbaycan Basketbol Liqasının VIII turunda "Gəncə"yə 73:80 hesabı ilə uduzduqları oyundan sonra deyib.

Mütəxəssis matça  yaxşı başlamadıqlarını bildirib: "Enerjimiz də yaxşı deyildi. Lakin addım-addım oyunumuzu və ritmimizi tapdıq və bundan sonra hesabda önə keçməyə başladıq, daha sabit oynadıq. Yaxşı oynadıq deyə bilmərəm, amma sabit oynadıq. Təşkilatlanma ilə bağlı müəyyən problemlərimiz var idi və 2 oyunçumuzu çox uzun müddət meydanda saxlamalı olduq. Polayt və Perkoviç həddindən artıq çox oynadılar. 5 dəqiqə qalmış 10 xal öndə idik, amma yenə də təşkilatlanma problemləri yarandı və mənasız top itkilərimiz oldu. Bu oyunun ən böyük problemi də məhz bu idi. Bu cür top itkilərindən sonra onlara çox asan xallar verdik.
Əlbəttə, onların götürdüyü bir neçə vacib ribaund da oyunumuza mənfi təsir göstərdi".