"Bir daha göstərdim ki, məni heç nə və heç kim dayandıra bilməz".

Prosport.Az xəbər verir ki, bu sözləri Azərbaycan karateçisi İrina Zaretska şəxsi instaqram hesabında yazıb.

Titullu karateçi Misirin paytaxtı Qahirədə keçirilmiş dünya çempionatında bürünc medal qazanması ilə bağlı fikirlərini bölüşüb: "3-cü yer uğrunda qarşılaşma inanılmaz idi. Yarımfinal mərhələsində səhv etdim. Bu, finala yüksəlməyimə və daha böyük uğur əldə etməyimə mane oldu. Buna baxmayaraq, güclü və güzəştsiz olduğum üçün fəxr edirəm".

O, böyüklər arasında dünya çempionatlarında 5-ci dəfə mükafatçılar sırasına düşdüyünü xatırladıb: "Artıq 10 ildir ki, ən yaxşıların sırasındayam. Hələ heç nə bitməyib".

Qeyd edək ki, İrina Zaretska 2014-cü ildəki dünya çempionatında Ukraynanı təmsil edib və bürünc medal qazanıb. O, 2018, 2021 və 2023-cü illərdə Azərbaycan bayrağı altında qızıl medala sahib çıxıb.