Bu gün Bakı vaxtı ilə saat 21:30-da "Neftçi" İdman Klubunun basketbol komandası FIBA Avropa Kubokunun qrup mərhələsinin V turu çərçivəsində Estoniyanın paytaxtı Tallində "Kalev/Kramo"nun qonağı olacaq. Komandamız dünəndən Kalev İdman Zalında məşqlərə başlayıb.

Prosport.Az-ın Tallinə ezam olunmuş əməkdaşı hazırlıqdan sonra "Neftçi"nin kapitanı olan Amil Həmzəyevdən müsahibə götürüb.

– Rəqibi artıq tanıyırsınız. Oxuculara bu oyunla bağlı nə deyə bilərsiniz?
– Oyun qurucumuz Marko Şinikin zədələnməsi bir az sistemimizi dəyişəcək. Bakıdakı oyunda da bu rəqibə qarşı sistemimizdə qala bilməmişdik. Camal Bey oyunun 4-5-ci dəqiqəsində zədələnmişdi. Rotasiyamız qısaldığından, həmin matçda yalnız 6 əcnəbi və mən oynamışdıq. Ümumiyyətlə, Azərbaycan klublarının avrokuboklarda rotasiyaları həmişə qısa olur. Bu dəfə Camal var, Marko yoxdur. Düşünürəm ki, Marko komandada daha vacib fiqurdur. Məncə, sonuncu matçda "Abşeron Layns"a uduzmalarından sonra "Kalev/Kramo" ümidlərini avrokubokdan üzdü. Amma yenə də evdə qələbə görmək istəyəcəklər. Çünki bundan sonra qrup lideri "Trefl"lə ev oyunları qalacaq. Məncə, ilk hissədə bütün gücümüzü qoysaq, onlarda 2-ci hissə üçün ümidsizlik yaranar və gənclərə üstünlük verərlər. Çox vacib oyundur. Çünki burada alacağımız qələbə son tur öncəsi bizim qrupdan çıxmağımızı 80% təmin edəcək.

– "Abşeron Layns" son matçda bu rəqibə qalib gəldi. Hərçənd, siz də qələbə qazanmısınız. İstənilən halda, "Abşeron Layns"ın tanıdığınız basketbolçuları ilə bu rəqib haqda müzakirə aparırsınız?
– Köməkçi məşqçi Anar Hacıyevlə arada danışıram. Elə məhz onlarla matça görə deyirəm ki, ilk hissədə var gücümüzlə çıxış etməliyik. Çünki "Abşeron Layns"la ilk hissədən sonra onlar vuruşmadılar. Biz də əvvəldən belə başlasaq, ardını rahat gətirə bilərik.

– "Sabah"la oyundan çıxıb Tallinə gəldiniz. Bir az həmin matçın da yorğunluğu varmı?
– Var, var. Düzdür, vacib itkini həmin matçda verdik. Amma deyərdim ki, çox gözəl oyun alındı. Digər periodlarda başa-baş oynasaq da, sonuncu periodda 7 dəqiq 3-lük atışları oldu. Çətin oyundan sonra səfərə getmək, əlbəttə, yorucudur. Ancaq avrokubok oynayan komandalar bunu nəzərə alıb, yola çıxıb. "Abşeron Layns" da son matçdan öncə Şəki səfərinə yollanmışdı. "Sabah" da bizlə oynayıb Bakıda "Şalon"u qəbul edəcək. Zədə olmasaydı, sabahkı (bugünkü) matç barədə daha arxayın danışmaq olardı. Ancaq inşallah, yenə də qalib gəlməyə çalışacağıq.

– "Sabah"la oyunda rotasiya edərək Avropaya fokuslanmaq olmazdımı?
– Bu, məşqçinin seçimidir. Mən əvvəlki müsahibəmdə də demişəm ki, "Sabah"la oyun çempionatın I turunda olmamalıydı, son tura salınmalıydı. Bu matç da təxirə salınsaydı, hər iki tərəf üçün yaxşı olardı.

– Federasiyaya müraciət etmişdiniz?
– Yox. Deyəsən, "Sabah" tərəf matçın 1 gün əvvələ keçirilməsini istəmişdi. Ancaq biz tərəf qəbul etməmişdi.

Səbuhi Musa
Tallin