"Şəki"nin amerikalı basketbolçusu Malek Deyvis klubun mətbuat xidmətinə müsahibə verib.

Prosport.Az həmin müsahibəni təqdim edir:

– Ötən mövsüm "Gəncə"də çıxış etdiyiniz halda, bu mövsüm "Şəki"yə keçməyə üstünlük verdiniz. Bu keçid necə baş tutdu, transferin alınmasında hansı amil rol oynadı?
– "Gəncə" ilə "Şəki"nin arasında 7 çox gərgin keçən oyun olmuşdu. "Şəki"yə qarşı çıxış edəndə baş məşqçi (Bedri Meriçi nəzərdə tutur – red.) ilə aramızda kiçik mübahisə olmuşdu. Ancaq düşünürəm ki, məşqçi meydana gətirdiyim atəş və ehtirası bəyənmişdi. Çünki eyni xarakterdə olan insanlarıq. Mövsüm ərzində eyni agentliklə müqaviləmizin də olduğunu öyrəndim və oyundan sonra hərəkətlərimə görə ondan üzr istəmək üçün zəng vurdum. Mövsüm bitdikdən sonra o və menecerim əlaqə saxlayıb, məni növbəti mövsümdə "Şəki"yə aparmaq istədiklərini bildirdilər. Bundan şad oldum. Bu komanda ilə birgə olmağı sevirəm. Həmçinin, məşqçi üçün oynamağı sevirəm. İçimizdə oxşar xarakter var.

– Ötən mövsüm "Şəki"yə qarşı oyunları necə xatırlayırsınız?
– Ötən mövsüm "Gəncə" və "Şəki"nin prinsipial rəqib olduğu hiss olunurdu. Oyunlar həmişə çətin, rəqabətli keçirdi və B qrupunda 1-ci yer uğrunda mübarizə gedirdi. Mən bu matçlardan son 5-də çıxış edə bildim. Çünki martın əvvəllərində komandaya qoşulmuşdum.

– Son turda sabiq komandanıza qarşı Gəncədə oynadınız və qalib gəldiniz. Amma həmin matçda cəmi 19 dəqiqə oynamaq imkanı əldə etdiniz. Bu matçla bağlı nə deyə bilərsiniz?
– Son oyun bizim üçün yaxşı qələbə ilə nəticələndi. "Gəncə"nin yaxşı komandası var. Amma bizim də yaxşı oyunçularımız var və düşünürəm ki, bunu qələbə ilə göstərə bildik... Hazırda bud əzələmdən zədə almışam, amma yenə də keçmiş komandama qarşı oynamaq istəyirdim. Ona görə də məşqçidən xahiş etdim ki, məni oyuna buraxsın. Bizimlə "Gəncə" arasında həmişə yaxşı mübarizə olacaq.

– Şəki şəhəri və Azərbaycan haqqında nə deyə bilərsiniz?
– Şəki kiçik yerdir, amma bura xoşuma gəlir. Bu bir az da oyuna çox diqqətimi cəmləməyə imkan verir. Bu il digər amerikalı komanda yoldaşlarımla yaratdığım əlaqə xüsusidir. Azərbaycanı ümumilikdə bəyənirəm, insanları çox mehribandır.

– Daha əvvəl Çin və Litvada legioner karyerası yaşamısınız. Bu ölkələri müqayisə etməyinizi xahiş edərdim...
– Hər ikisi fərqlidir. Çindəki oyunlar daha çox fiziki və daha sürətli idi. Digər tərəfdən, Litvadakı çempionat daha metodikdir. Bu 2 ölkəni də bəyəndim, hər ikisi kollecdən Avropa səviyyəli oyun üslublarını öyrənməyə qədər inkişafıma kömək etdi. Hər iki təcrübədən faydalandım.

– Sabah (bu gün) "Abşeron Layns"a qarşı çıxış edəcəyik. İlk matçda Abşeronda FIBA Avropa Kubokunda çıxış edən bu komandaya uduzmuşduq...
– Çətin bir mübarizə olacağına inanıram, amma biz bu oyuna hazırıq. "Abşeron Layns" yaxşı komandadır. Dediyiniz kimi, Avropa Kubokunda çıxış edirlər. Amma bizim də yaxşı komandamız var. Bu özümüzü göstərmək və hər kəsin bizi zəif görməkdə səhv etdiyini göstərmək üçün yaxşı oyun olacaq.